Екстерен екстремизам

Една од најексплоатираните теми деновиве - екстерното тестирање за оценувањето во образованието. Како моја несудена професија, а долгогодишна професија на членови од мојата фамилија, башка родител на деца кои се ученици, неможам да се правам на триипол (иако се трудам 24/7) покрај  колективното „солење памет“ во однос на темава. Дозирањето соленост и покрај тоа што е индивидуално, по вкус... во случајов (за нас толку вообичаено) се подели на два табора. Едни сакаат пресолено, други блуткаво. Во време на екстремизам непожелно е да се биде умерен. Не за друго, туку те маваат и двата екстрема истовремено :)

Најпрво да се изјаснам - јас сум ЗА екстерни тестирања со кои би се утврдувала објективноста во оценувањето на учениците од страна на професорите. Но сум ПРОТИВ тие тестирања да се изведуваат така екстремно - како завршни испити за одреден („избран“) предмет на крај од школската година. 

Секој професор, без оглед дали предава во училиште за основно или средно образование, на почетокот од школската година подготвува програма, план за обработка на предвидените наставни содржини - за целата година, но класифицирана низ месеците. Согласно планот, етапно го изведува предавањето на предвидениот образовен материјал и формира оцена за знаењата на ученикот во секое тромесечје од школската година. Всушност, првата оцена е задолжителна пред крај на првото тромесечје (средина на ноември),  втората до крајот на првото полугодие (крајот на декември), третата оцена ја определува пред крај на тромесечјето од второто полугодие (крај на март) и последната, четврта оцена на крај од школската година (крајот на мај, евентуално прва недела од јуни).  Од сите тие оцени добиени преку годината, на крај се формира конечната оценка. Притоа, во формирањето на конечната оцена значајна улога имаат и други особености на ученикот - редовноста на учењето, согледувањето дали учи механички (напамет) или со разбирање, дали развива способност да го примени стекнатото знаење во секојдневниот живот преку компаративност на научените принципи, дополнителните активности во однос на училишните предмети, иницијативноста... На пример, колку често сме сретнувале случаи кога некој ги знае математичките дефиниции и формули како стихотворби за рецитирање, а не умее да реши текстуално поставена задача заради неможноста да ја согледа и изведе равенката од неа?! Образовните професии бараат и различни вештини. Професорот е учител, психолог, социолог, другар, пример т.е. авторитет (позитивен или негативен), родител... вајар на интелектот на ученикот. Според мене, една од најблагородните професии со исклучително значење во развојот и напредокот на целокупното општество. За жал, слабо платена (што резултира со немотивираност). Но тоа е веќе друга тема. Не помалку вредна, но засебна.

Претпоставувам дека програмите, плановите за обработка на предвидените наставни содржини кои ги имаат сите професори, редовно се доставуваат до просветните инспектори. Оние истите кои треба да го спроведат екстерното тестирање за оценувањето. Е па, зошто да се чека крај на школска година и да се креираат тестови кои во себе ќе содржат прашања од целокупниот материјал предаден низ годината по одреден предмет? Проверка на знаењето стекнувано ЦЕЛА година во еден единствен тест и споредба на оцената добиена етапно преку годината со оцената добиена од посочениот тест. Со тоа непотребно се создава напната ситуација и кај професорите и кај учениците. Професорите тенденциозно ги намалуваат оцените, а учениците паничат дека нема да успеат да го повторат целиот материјал. Се јавува несигурност и кај едните и кај другите. А несигурноста создава страв кој во случајов се артикулира преку барање причини за одбивање на спроведувањето на оваа иначе корисна идеја. Корисна, затоа што доколку во некоја професија постојат неправилности и злоупотреби, потребно е да се изнајде начин како тие појави да се лоцираат и санкционираат. Самиот образовен процес те учи секогаш да го проверуваш добиениот резултат. 

Наместо годишен тест, просветните инспектори преку анализа на наставните планови можат да изработат засебни тестови за одредени етапи во школската година и ги спроведат ненадејно, ненајавено. Проверка на првата, втората, третата или четвртата оцена. На пример, влегуваат во дел од училиштата во сите оделенија со соодветно подготвени тестови (согласно планот за предавање на содржините за тој период)  за одреден предмет во ноември и потоа со нови соодветни тестови за различна етапа од предавањето за нов одреден предмет во март. А во другиот дел од училиштата, по истиот принцип за креирање тестови, прават контроли во декември и во мај. Ниту професорите ќе имаат сознание која оцена ќе им се проверува, ниту учениците ќе имаат притисок дека на крај од година мораат да помнат СЕ‘ за СИТЕ предмети. На тој начин ќе добијат реални информации за објективноста при оценувањето на професорот,  но нема да биде повреден интегритетот на ученикот преку „одредување“ и ставање под сомнеж на завршната оценка. Информациите добиени од овие тестирања ќе бидат разгледувани на наставничките совети и училишни одбори, и истите ќе бидат предмет за утврдување на одговорност кај професорите доколку се забележат крупни отстапувања. 

Значи, екстерно тестирање -ДА, екстремно т.е. одеднаш за целиот материјал на  крај од година - НЕ. 

П.С. Кога сум веќе на тема за образованието, да додадам уште нешто. За веронауката. 

Се користат примери од другите држави каде има веронаука во училиштата. Но не се кажува начинот на кој се спроведува. Учителите по веронаука таму не се вработени во Министерствата за образование, туку во Црквите. Не земаат плата за своите часови од државата, туку ги плаќа црквата. Имаат договори со училиштата (преку министерствата секако) да доаѓаат во одредени термини за часови како гости предавачи и изведуваат факултативна настава. Согласно религиозните определби и избор на самите ученици (преку согласност на нивните родители). И таквиот начин не се коси со секуларноста декларирана во уставот.

Не е до Уставниот суд. Не е ни до веронауката. До зачинот, т.е. моделот на имплементација е.  

п.с. објавено на http://oksimoron.blog.com.mk на 9 Мај, 2009 - 18:42

Коментари:

Единственото нешто што е полошо од лоша идеја е добра идеја лошо спроведена.
(Нено Богдан 9 Мај, 2009 - 18:46 | логирај се за да пишуваш коментари)

Да Нено, како идејата за зголемување на демографскиот прираст на населението со паричен надомест за трето дете!
Добра идеја - катастрофална реализација!
Резултат - уште полош!
(alexandro 9 Мај, 2009 - 19:03 | логирај се за да пишуваш коментари)

Западна Европа, Америка, Азија...сите имат надворешно оценување. Нема значење дали училиштето, учениците и наставниците го прифаќаат или не. Запишувањето на колеџ или универзитет, условено е од оценката добиена на специјализираните тестови (САТ 1, САТ 2, АП), како и добивањето право на диплома за завршена гимназија. Македонските студенти, сем оние што одат во НОВА и во Кемал Јахја, практично се без поголема шанса да ги продолжат студиите во земји чии колеџи бараат вакви испити. На пример, ако е студентот со сите петки од прво одделение до 4-та година гимназија, а на специјализираните тестови постигне слаби резултати, не само што нема да ои примат, туку целото училиште, со генерации, нема да успее да внесе ниту еден студент на добар колеџ затоа што е јасно дека оценките во тоа училиште не се добиваат според знаењето. Подобрувањето на успехот на учениците на тие специјализирани тстови, резултира во поголми плати за учителите. Едноставно, логично, за цел свет,сем за нас.
(Кирил Дрангов 9 Мај, 2009 - 19:07 | логирај се за да пишуваш коментари)

Слабо се платени професорите и наставниците?
Можеби,но кој во оваа држава е добро платен?
Тоа не е оправдување за начинот на кој некои,не сите,
ги извршуваат своите работни задачи.
А за веронауката,па тој модел кој го предлагаш,
нели и тој беше воведен,па исфрлен пред неколку години.
Идентично онака како што го опиша.
Плати да добиваат од црквата,
во договор со училиштата и согласност од родителите.
Поздрав.
(Effo 9 Мај, 2009 - 19:17 | логирај се за да пишуваш коментари)

Кирил баш ми е гајле за Америка. И плус не си во право. (Lost series 9 Мај, 2009 - 19:56 |логирај се за да пишуваш коментари)

Која зафрканција ќе испадне од образованието дури сега ...
Дури сега ќе има нереално оценување. Вчера по училиштата стигнаа термините кој кога ќе биде тестиран. Секој наставник ќе биде тестиран во едно одделение, и тоа одделение до крајот на годината ќе учи само еден предмет, евентуално 2, оцените таму ќе се намалат, а другите оценки ќе се зголемат, за да не се `оштетат` учениците, а ние наставниците за да се заштитиме едни со други. Досега немавме причина за да оценуваме нереално, освен се разбира, 2, 3 од пријатели, а сега се 100 ученици со попуштени оценки, затоа што се присилени на тоа да се заштитат.. ако сум јасна, ако не ќе пишам поопширно кај мене.
Како што знаеш , дирекно сум вклучена во овај процес и не претпоставувам, знам дека ова не е начин. Единствено да се сменеше уписната политика и ништо друго не требаше..Дури и да испадне како што министерството сака, тие 20% од наставниците кои ќе бидат казнети за `несоодветно` оценување ќе бидат квалитетните наставници. Бев вклучена во обуки и во многу училишта и знам дека најстарите наставници, најчесто кои не се во тек со новите трендови, било со ИКТ, било техники методи, пишуваат еден куп кецови, затоа што со ништо не ги мотивираат децата и така ќе испаднат и најреални.
(seelenluft 9 Мај, 2009 - 20:12 | логирај се за да пишуваш коментари)

Seelenluft ОУ МАЈ ГАД некој конечно успеа да каже дека сега има повеќе врски од било кога претходно! Фала ти, знам дека нема да ти поверуваат, ни мене не ми веруваа (како ученик кој со свои очи гледа како се лигават измеѓу себе професорите и „најдобрите“ ученици), ама важно не сум сам!
Гад блес ју. 
(Lost series 9 Мај, 2009 - 20:18 | логирај се за да пишуваш коментари)

Учениците, веројатно поради неинформираност, се уплашија од екстерните тестови. Екстерните тестови не се новина ни кај нас, а во другите земји одамна ги има. Се спроведуваа еден период кај осмоодделенците, но само по предметите Македонски јазик и Математика.
По интернет добивме некои пробни тестови и јас извршив проверка кај моите ученици...испрашував по случаен избор и при тоа настојував да ги испрашам помрзливите...децата ги знаеја одговорите. Инаку оваа година тестот ќе е пробен, за да се види дали ќе треба да се прават некакви корекции.
Многу објективен пост.
Поздрав Окси...
(partik1 9 Мај, 2009 - 20:20 | логирај се за да пишуваш коментари)

Чек чек, зарем некогаш немало врски, и кој е тој што верува во нешто друго?
Нормално е секаде да се има пријатели, ама на моите пријатели душата им ја вадам. Ќе добијаат оценка, ама има и да научат повеќе од нормално 
не пропаѓа образованието од пријателите. Пропаѓа од погрешна уписна политика како прво, пропаѓа од многу западни нетестирани `проекти` и експерименти кај учениците, пропаѓа затоа што 90% од популацијата неправилно ја сфаќа демократијата и правата на децата (или ги сфаќа и правата, но не и обврските), пропаѓа затоа што не поседуваме никаква морална и етичка култура, а со тоа и минималниот авторитет што мора барем малку да го имаат учениците кон наставниците за да научат нешто го немаат... до утре можам да зборувам 
(seelenluft 9 Мај, 2009 - 20:28 | логирај се за да пишуваш коментари)

екстерно оценување- да...
прашањето е ’како?’...
окси, добро забележа...
нејзиниот предлог е можеби покомплициран само, но има суштина...
веќе постојат стандарди и критериуми за оценување ...
досега тоа не беше случај: имаше разлика во оцените од случај во случај: петка по еден предмет кај еден наставник и петка по истиот предмет кај друг наставник/ училиште/ град не се формира на ист начин...
екстерните тестови треба да ги следат стандардите и критериумите кои постојат...
станува збор за комбинација од сумативно оценување(1,2,3,4 и 5) и формативно (континуирано следење и оценување по нивоа) ...
проблемот е што екстерните тестови оценуваат сумативно, што значи, нема голема разлика од досегашната пракса во оценувањето...
која е логиката да се бара во наставата формативно оценување според блумовата таксономија, а на крај да се формира сумативна оцена?!
затоа, тестовите треба да бидат по нивоа: ученик што добил петка, да решава тест за пет (условно) и потоа да се споредат резултатите и отстапувањата на скала...
секој тест да има дел кој ќе му овозможи на ученикот да покаже знаење од повисоко ниво, но не и сите ученици да решаваат исти тестови, на исто ниво...
како ќе се исклучат ’среќните’ одговори во тој случај, поготово затоа што се работи за тестови на заокружување?...
можеби треба да се исклучи факторот личност во оценувањето: наставниците да бидат само предавачи (и учесници/ креатори на тестови и тестирања), а формирањето и добивањето оцена да биде објективно, континуирано и организирано од БРО преку екстерни тестирања за секое тримесечие според резултатите на тестот на ученикот и тоа да биде јавно и транспарентно, со можност, доколку ученикот или наставникот изразат желба, ученикот да го преполага тестот во одредени термини, доколку не е задоволен со својот резултат...
целта треба да биде постигнување подобри резултати, а не казнување за неуспех: тоа е најлесна работа...
доколку се формира оцената независно и објективно, според однапред дадени критериуми и стандарди, и родителите и ученикот ќе знае што ќе се оценува и што треба да знае за одредена оцена и секој ученик според сопствените можности да се пронаоѓа, а наставниците да бидат само посредници до знаењето и да откриваат и развиваат потенцијал кај учениците...
...
што се однесува до штрајкот на основците и на средношколците...
на учениците не им е местото на улица...
кога би бил родител, не би сакал да го видам моето дете да штрајкува на улица, да мава јајца по институции, да вика, да пцуе, да плука: да биде инструментализирано и изманипулирано...
не знам како би се чувствувал и што би презел, но сигурно нема да остане така...
деца на улица во штрајк- тоа е најлошиот пример, и најголемиот луксуз што родителите, наставниците, државата може да си го земе...
како ќе ги научиме и натераме тие деца да ги почитуваат институциите кога така лесно некој им дозволил или ги поттикнал да се откажат од нив, да негуваат револт и гнев кон нив, без и да знаат зошто е тоа така и која е причината за нивниот револт...
најчест одговор на учениците зошто штрајкуваат е: - за да земаат наставниците поголема плата (погрешно поврзување на екстерното оценување со казнувањето/ наградувањето на наставниците)...
мислам дека е крајно време да престанат децата да ги вовлекуваат и користат во политички борби и пресметки...
до каде води желбата да се делигимитизира една власт и која е цената што политичките партии се подготвени да ја платат за тоа...
го имаат ли тие тоа право, и кој им го дава тоа право...
ако постои сигурен начин не да се сруши една власт, туку цела држава (не сега, не веднаш, но секако подоцна кога овие деца ќе пораснат) е токму тој: да се носат децата постојано на улица, да се потхрануваат со гнев и омраза, со цел да се конторлираат и манипулираат преку зовриени страсти и тоа да стане научен и прифатен начин на однесување кој сите многу и скапо ќе не` чини...
да не дозволиме нешто што ќе биде многу корисно за сите, одвнатре да го саботираме преку децата и создавајќи отпор единствено за да ја прикриеме сопствената неработа, незаинтересираност и неспособност...
...
поздрав... 
(prezviterkozma 9 Мај, 2009 - 21:10 | логирај се за да пишуваш коментари)

морам мал коментар да дадам:) mozam samo da kazam,fala mu na boga,mojata kerka samo prvo oddelenie go zavrsi vo makedonija,odnosno kavadarci,kolku da ja nuachi kirilicata,i majchiniot jazik,teska tema za toa kako se ocenuva:) nastavnickata na mojat kerka ,posle prvoto polougodie ni dade izvestaj,koi oceni ke gi imale nasite deca,kako zavrsni oceni.i dojde do tamu da ja oceni kerka mi po makedonski i mi vika,vaseto devojce ke ima cista 5ka:)e mi pukna i smealoto,i filmot:) moeto devojce,vo toa vreme ,koga jas bi bila pedagog,nemase da zasluze poveke od 3 ka,i toa i go kazav na nastavnickata,koja se nadevase deka za podobra ocenka ke bide nagradena od nas.ja zamoliv samo da i ja namili ocenata.i go napravi toa.dovolno sum realist,i znaev kolku i sto znae moeto dete,zatoa sto jas so nego doma sedev i na domasnite i se preslusuvavme.za nacinot na ocenuvanje kaj nas,tocno e toa deka treba nesto da se smeni,no ne da bide ekstremno.kako moze samo eden test,na krajot od godinata da resi se?nikako.i toa deka,treba najmalku 4 takvi testovi vo tekot na ucebnata godina da se izvrsat i toa e tocno,no sekoj test da bide i podelen,na teorija,prakticen del,da se pogledne i redovnosta na domasnite zadaci itn,sto znaci eden test,od eden predmet,podelen na poveke dela,koi ke se soberat za sevkupnata ocenka,i potoa realno da se podelat.eden test,za zavrsna ocenka.koja komedija:)a inaku,veronaukata,ne vo sekoja zemja nastavnicite po toj predmet se plateni od crkvata,vo nekoi drzavi gi plaka i ministerstvoto za kultura.i koga sne veke za klutura,licno jas,godinava,posle veligdenskite praznici,bev vo rektoratot na filoloski fakultet vo skopje,i pobarav nekolku informacii.gospozata,ne znaese nisto potocno da mi dade,ja zamoliv da mi dade barem internet stranica i telefonski broj:)sega povtorno me faka smea,gospozata jadese burek,pa skina mala hartija mrsna od burekot,i mi zapisa nternet stranica i telefonski broj:)))) koj ne veruva,imam dokazi,i svedoci:)) kultura? toa e se,duri i mnogu e:) pozdrav.
(laleto 9 Мај, 2009 - 21:26 | логирај се за да пишуваш коментари)

Неколку работи во текстот со кои не се сложувам:
1 - Дизајнот на тестот треба да се справи со бубаторските случаи. Меѓу другото, тест дизајниран од професионалци би требало да биде поефикасен во тоа отколку просечниот наставник.
2 - Проверка на знаењето стекнувано во текот на целата година е норма на факултетите, а ќе биде норма и на приемните испити/матурата. Затоа наместо напнатост и отфрлање, децата треба да се соочат со новите реформи и да ги прифатат. Инаку не се работи за завршен испит кој ја дава целокупната оценка, туку само за необврзителна проверка на знаењето.
3 - Идејата за ненадејни и ненајавени тестови создава уште поголем притисок, и секако дека ќе даде нереални резултати, затоа што дури и добрите ученици нема да имаат научено.
4 - Дали може некој да објасни што има лошо во тоа ако професорите ги намалуваат оцените, со цел да кореспондираат пореално со екстерните тестирања? Се додека сите наставници ги намалуваат оценките, никој не е обесправен. Има само почиста градација (како на учениците, така и на наставниците), испливување на површина на подобрите, и објективен стандард на покажано знаење и квалитет на предавање.
Коментарот од инсајдер како зеленлуфт е интересен.
Непредвидената последица е што ќе се прави баук од само еден предмет и ќе се запостават сите други. За да се реши тоа:
-или треба да се тестираат сите предмети подеднакво.
-или не треба да се најавува во кое одделение ќе се тестира, само датата, па така сите ќе треба да учат подеднакво, и оценките ќе се намалуваат подеднакво по сите предмети.
Се сложувам дека проблемот во принцип може да се реши и со промена на уписната политика (приемни испити), но и тоа е една форма на стандардазирано, екстерно тестирање. Но во тој случај, доколку се важат оцените од основно, односно средно, не би имало фидбек механизам кој ќе ги мотивира наставниците да оценуваат пореално. Затоа мислам дека треба да постои и екстерно тестирање и стандардизирана матура/приемен.
Најтажниот момент во целава ситуација е што оваа реформа се спроведува уште од времето кога јас бев во средно, а еве веќе 7-8 години поради разни притисоци од сите страни никако да започне.
(Сатаниел 10 Мај, 2009 - 19:16 | логирај се за да пишуваш коментари)

Нено,
добра ти е забелешката  иако моето мото е дека „нема добри или лоши идеи, туку само идеи кои се реализираат и идеи кои не се реализираат“. Резултатите (позитивни/негативни) зависат од начинот на реализација 
Alexandro,
соодветен пример 
Кирил Дрангов,
токму затоа се воведуваат екстерните тестирања и кај нас, за да не се доведуваме во „непријатни“ ситуации и да не дозволиме формирање дополнителни етикетирања на цели генерации ученици 
Ефо,
уживаш да контрираш  ако, потребно е тоа за поттик на дискусија 
не се бараат оправдувања, туку начин за поефикасно спроведување на реформите во образованието и успешно санкционирање на утврдените неравилности.
За веронауката, не се сеќавам за официјално воведување на тој модел, но и ако било - сигурно не бил исфрлен поради неуставност туку поради незаинтересираност на учениците, што е многу голема (и дискутабилна) разлика.
Поздрав
Lost,
плус-минус, најдобро ќе ти биде да седнеш да учиш  Загајлена е работава 
Seelenluft,
многу добро ми се познати состојбите во училиштата и ирационалноста која владее во моментов таму. Намалувањето на оценките со намера да се „натаманат“ претпоставените резултати од екстерниот тест може да биде меч со две острици. Еве, на пример, ако на некој ученик кој има 3 кај тебе му ја намалиш оцената на 2 а тој сирот учел за да ја поправи на 4 и сеа запнал па на екстерниот тест навистина извади 4 - сепак се јавува разлика, отстапување од 2 оцени и наставникот се проценува како необјективен (сеедно е дали оценува повеќе од заслуженото или помалце). Не верувам дека намерата е да се исполнува некаква квота од 20% професори за казнување, туку создавање на навики за реално оценување.
А за тие најстарите професори на кои најлесно им е да пишат единици..... ако една третина (или уште полошо, половина) од одделението имаат единици по одреден предмет - тоа говори најмногу за неспособноста на професорот да ги заинтересира и мотивира учениците, неговата нестручност и можност за пренесување на знаењата. Во таква ситуација не се учениците оние кои се „мрзеливи и незаинтересирани“, туку баш професорот. 
За уписните политики се согласувам со тебе дека мора да се воведат новини, а она со разбирањето на „правата и обврските“ ти е директно во центар 
Партик,
нормално е да се исплашат учениците кога „некој“ им ги претставува тие тестирања како пресудни за нивните оценки во свидетелствата. На тој начин тенденциозно се префрла тежната од „проверка на објективноста при оценувањето“ во „проверка на знаењата “. Башка проблемот што прашањата на тие тестови ќе бидат од целокупниот материјал што го учеле изминатата година по некој предмет.
Убаво од тебе што си ги проверувал своите ученици, тоа сигурно делувало на нив да бидат малку посамоуверени во однос на тестов.
Поздрав 
Презвитер,
критериумите за оценување се стандардизирани и јасни, екстерното тестирање има за цел да провери дали тие се спроведуваат и дали функционираат. Сосем си во право дека има превиди и дека уште мнофу други фактори имаат улога при оценувањето, но затоа пак секој професор треба да си има развиено стратегија 
Јас секогаш ќе се сеќавам на професорот по македонски јазик во средно, Мркев, кој имаше некој сократовски принцип при предавањето на материјалот. Ни најавуваше една недела порано која книга ќе ја обработуваме и после на час не раскажуваше и не предаваше готови сознанија, туку преку прашања не наведуваше самите ние да доаѓаме до заклучоците и поентите. На тој начин знаењето многу подолго се задржува во нас, а многу лесно се открива кој навистина ја прочитал книгата а кој симулира.
Целосно се согласувам со твоите забелешки дека „...целта треба да биде постигнување подобри резултати, а не казнување за неуспех: тоа е најлесна работа...“ и „...секој ученик според сопствените можности да се пронаоѓа, а наставниците да бидат само посредници до знаењето и да откриваат и развиваат потенцијал кај учениците...“
Многу убаво кажано 
А за децата на улица кои штрајкуваат, некој треба да преземе одговорност. Инструментализацијата и манипулацијата на децата во вакви случаи е за целосна осуда. Не сум за тоа да им се оспори правото на протест, но не на ваков начин. Постојат толку многу други начини за да се изрази револт или несогласување отколку грубо викање, фрлање јајца и слично. Доколку не се согласуваат со нешто - можат едноставно организирано да не се појават на тестирањата или да одбијат да ги пополнуваат тестовите. Многу посилен ефект би имало тоа отколку ова на што ги наведуваат злонамерниците. Иако, во конкретниов случај, со тестовите не се загрозени учениците туку професорите.
Поздрав 
Лале,
ретки се родителите кои покажуваат таква објективност во случаи кога таа е негативна за нивните деца. Повеќето замижуваат и прифаќаат идеализирање.
А ова за линкот и телефонот на хартија измрсена од бурек не си ми го кажала досега, ма )) А бе, ете жената барем се потрудила да ти даде некаква информација, де 
Сатаниел,
1. Би требало. Ама и превиди има често. Чисто заради поимањето „професионалец“ кај нас, де 
2. Се согласувам со тебе. Незнам со кој дел од текстот не се сложи ова. Проверката на знаењето, необврзителна, се прави заради утврдување на објективноста при оценувањето. Но „некој“ на учениците им ја искривува перцепцијата дека таа проверка има улога на завршен испит од кој ќе им зависи оценката.
3. Заради искривената перцепција која лесно се креира кога тестирањето е едно и на крај од школска година, сметам дека е подобро и поефикасно да има неколку такви тестови во текот на школската година. Кога тестовите ќе бидат креирани соодветно за одреден период, нема простор за паника - ученикот полесно ќе одговори на тест кој содржи прашања од материјал кој го учел последните два месеца и за кого неодамна добил оцена (првата, втората, третата или четвртата оцена во тек на годината) дури и кога е ненадеен тој тест, отколку на тест кој е најавен а содржи прашања од ЦЕЛАТА измината година и за кој материјал веќе бил етапно оценуван. Ученик кој учи редовно умее од понудените одговори да го препознае точниот (колку што знам, тестовите ќе бидат само со заокружување од понудени одговори), полесно ако материјалот го учел неодамна.
4. ова го објаснував погоре, во делот каде одговарам на коментарот на seelenluft. Само ќе додадам дека различни ученици различно реагираат. Кај некои критиката има поттикнувачки ефект, кај други демотивирачки. Така да... колку добро толку и лошо се постигнува. Професорите мораат да градат и психолошки профили за индивидуален пристап таму каде што е потребно.
„...мислам дека треба да постои и екстерно тестирање и стандардизирана матура/приемен...“
Се согласувам и јас со твоето мислење  Само треба да се изнајде добар модел за да тоа биде успешно спроведено и функционално. Почнува, почнува 
Поздрав
(oksimoron 10 Мај, 2009 - 23:27 | логирај се за да пишуваш коментари)

„Ученик кој учи редовно„ е пропаднат идеал на едно друго време. Не е битна редовноста на учењето, битен е квалитетот на наученото. Јас сум ти жив пример.
(Сатаниел 11 Мај, 2009 - 18:20 | логирај се за да пишуваш коментари)

Сатаниел, зборуваш глупости.
Твјот пример, каков и да е, не може да биде универзално применлив.
Редовноста во учењето е еден од најбитните елементи во формирањето на оценката во западните земји и Америка, а без таа западна ориентација во едукацијата, ќе останеме на средновековно ориентално ниво. Оценката од завршниот тест се додава на сите други тестови работени во тек на семестарот или годината.
Патем, квалитетот на наученото е основната цел на секое учење, што твојата констатација ја прави бесмислена.
Излези од "јас" и обиди се со "ние".
(Кирил Дрангов 12 Мај, 2009 - 18:21 | логирај се за да пишуваш коментари)

Сатаниел,
терминот „ученик кој учи редовно“ не е употребен како алузија на некаков идеал (било каков) и сметам дека баш е битна редовноста на учењето (перманентна надоградба на знаењата во континуитет), зашто во спротивност квалитетот на наученото се добива по потешкиот пат - учење одеднаш на „прескокнатото“за краток рок, под притисок.
Ако не научи детето да решава обична равенка со една непозната, како ќе решава систем од линеарни равенки со повеќе непознати?
Ти си добар, но редок пример. И јас бев слична (студирав вонредно додека истовремено работев, одгледував деца и мал милион други обврски), знам кој е данокот на потешкиот пат 
Кирил Дрангов,
Сатаниел може да зборува за сешто, но тоа никогаш не се глупости. Паметен дечко е тој.
Редовноста на учењето е важна заради самиот ученик, за нему да му биде полесно совладувањето на знаењата, а во насока на квалитет на наученото и со тоа формирање подобра оцена.
Се согласувам со добар дел од твоите укажувања, но внимавај при начинот на нивното презентирање, немој да употребуваш навредливи квалификации за другите учесници во дискусијата 
Инаку, НИЕ е збир од повеќе ЈАС. Чудесна социолошка математика е тоа - колку повеќе се намалува вредноста на ЈАС толку поголемо станува НИЕ 
(oksimoron 12 Мај, 2009 - 21:03 | логирај се за да пишуваш коментари)

Знаеш што Окси, јас сум револтиран од овие „тестови“ на нашето знаење. А уште повеќе сум револтиран од вас, професорите. Вие ни се жалите на нас за тестовите, ни давате сто подготвителни теста за истите, не испрашувате по 100 пати и после сето тоа се сведува на кукавичко кукање пред нашите очи. За жал, тоа е тоа, во Македонија само знае да се кука, ништо не се превзема. А другите ќе не исмејуваат, и мене како ученик (дека не учам, ДЕМЕК) и тебе како професор (бидејќи не ги учиш децата, ДЕМЕК). Зошто?
БИДЕЈЌИ САМО КУКАМЕ И НИШТО НЕ ПРЕВЗЕМАМЕ. Зошто никој од вас не се здружи на протест? Зошто никој од вас не излезе на медиум да ја каже вистината? Зошто никој од вас покрај тоа кукање пред нас, ништо друго не прави? Знаеш зошто? Бидејќи сте исплашени дури и да си го искажете својот револт. Мене, како професор, некој да ми каже да му ја ставам на ученикот последната оцена која ќе ја добие (ова го дознав од комшика која предава, не можеш да ми кажеш дека не е точно) или дека треба да имам посебни листи на кои ќе пишувам колку СЕКОЈ ученик е активен за време на секој час (што е практични неизводливо ако еден клас на пример има 34 ученици) би му акнал бокс без размислување. БЕЗ РАЗМИСЛУВАЊЕ. Но не, во Македонија се на крајот се сведува за која партија си го дал гласот.
За срамота. Понекогаш е навистина срамно да си МАКЕДОНЕЦ...
(Lost series 12 Мај, 2009 - 21:31 | логирај се за да пишуваш коментари)

Во 2003 беше исфрлена веронауката, не поради незаинтересираност на родителите,
ами поради истите причини, идеолошки.Како и сега.
А не контрирам колку ради форма,школството ни е за никаде,тоа го знат сите.
А што треба да се направи???Оставам вие поупатените тоа да го решите.
(Effo 12 Мај, 2009 - 21:38 | логирај се за да пишуваш коментари)

Лости,
правиш грешка во чекори. Уствари неколку 
Овие тестови не се за проверка на вашето знаење. Јок. Тие се за проверка на објективноста при оценувањето на вашите професори. Значи, тестовите ги решавате ВИЕ а со нив се оценуваат - професорите! 
Затоа и се кукањата. А тоа дека оценката добиена од екстерниот тест ќе биде и крајна оценка на ученикот е она искривување на перцепцијата за кое зборев погоре а кое ви го прават одредени професори со чисто манипулативна цел.
И, не работам како професор. Вработена сум во сосем друг сектор  
Ефо,
во 2003, со тој модел,укинувањето на веронауката веројатно било политичка одлука на (тогаш)актуелната власт. Годинава беше одлука на уставен суд поради правна неиздржаност. Пак ќе речам - многу голема разлика има!
Да не ме разбереш погрешно, и јас сум против веронаука како задолжителен изборен предмет во образованието. Подобро е воведување на Етика, отколку веронаука (ако целта е морализирање).
Прашањето „што да се прави“ е корисно кога е на почеток од процесот, не на крајот (тогаш најчесто се спасува што може да се спаси)  
(oksimoron 12 Мај, 2009 - 22:15 | логирај се за да пишуваш коментари)

Мила
само да се потпишам 
(Леонова 12 Мај, 2009 - 22:24 | логирај се за да пишуваш коментари)

Мене никој не ме манипулира! Ова се размислувам со своја глава. Се работи за оцена која цела година сум ја градел и која има можност да ми се расипе со еден единствен тест. АПСУРДНО. Така што, немој да ми ги извртуваш зборовите и плус да додадам дека ми ја избегнуваш темата.
А штом не си професор, тогаш не би знаела што им порачале тие „одговорните“ на нив, така?
Ајде поздрав.
(Lost series 12 Мај, 2009 - 22:28 | логирај се за да пишуваш коментари)

Оксиморон
Интелигенцијата не значи паметност. Светот го сознаваме преку сопствените сетила и когницијата, но ако врз тоа исксутво изведеме генерализиран заклучок, не сме паметни.
Паметта се докажува со тоа што ќе го направиме во животот, не со потенцијалот за правење. Личноста што е нарцистична и егоцентрична, не треба да се храни со комплименти.
Го повлекувам зборот "глупости".
(Кирил Дрангов 13 Мај, 2009 - 02:46 | логирај се за да пишуваш коментари)

Леонова,
благодарам мила
поздрав 
Лости,
не ти ја избегнувам темата душо, ама ич. Сал ти изгледа не сакаш да ги видиш одговорите 
Како што споменав некаде погоре, состојбите во образованието ги знам иако не работам таму (а дипломирав за таа професија) бидејќи мајка ми, сестра ми и свекрва ми се во образованието. Плус, син ми е во средно (изглеа генерација сте) а ќерка ми во основно (при крај) па одам на родителски редовно 
Следната година и самиот ќе утврдиш дека екстерните тестирања се корисни за тебе, а прашањето во постов е само за начинот на кој тие се спроведуваат.
Ајде поздрав и не се нервирај толку 
Кирил Дрангов,
се согласувам, интелигенцијата не значи докажување на памет, туку потенцијал.
не барав да комплиментираш никому, само почит за соговорниците 
За повлекувањето на „спорниот“ израз - риспект од мене 
(oksimoron 13 Мај, 2009 - 13:29 | логирај се за да пишуваш коментари)

„Следната година и самиот ќе утврдиш дека екстерните тестирања се корисни за тебе, а прашањето во постов е само за начинот на кој тие се спроведуваат.“
А ти што мислиш, за што проклето се бунам јас? Нека даваат тестови на секои 3 месеци, колоквијално, КАКО ШТО СЕ ПРАВИ НА ФАКУЛТЕТ, а не од мене да прават екс-студент (бидејќи до пред 2 години они така беа тестирани), а од студентите да прават екс-ученици!
(Lost series 13 Мај, 2009 - 18:45 | логирај се за да пишуваш коментари)

Лости,
ами шо се расправаш тогаш со мене тука, не гледаш дека и ја за истото се бунам   
(oksimoron 13 Мај, 2009 - 22:28 | логирај се за да пишуваш коментари)

Екстерно тестирање за да се открие правата оценка=знаење кое го акумулирал ученикот во текот на 9 месеци од школската година. ????? Секој дури и подпросечен студент на било кој наставнички факултет/смер знае (од методика) дека оценувањето е/треба да е континуирано и тоа во себе треба да ги содржи не само знаењата него да биде одраз на севкупната работа на ученикот во текот на целата шк.година. Значи знаење+активност+домашни+редовност+дисциплина итн итн.... Прашање за милион долари „Како во 45 мин. на 30 прашања некој ќе оцени дека ученикот Зоки Поки бил активен,редовен и се трудел навистина се трудел, никогаш не бил без домашна итн, ако на тестот има 31% бодови?“ Можеби во МОН имаат некоја тајна формула која уште не ја објавиле? Секој еден кој учел педагогија и психологија сигурно слушнал ако не научил дека на некои ученици (зависно од личноста) им треба стимулација за да го дадат максимумот. Стимулација преку убав збор, преку провокација, преку поголема оценка на крајот на криштата. Како да му објасните на тест со 30тина прашања дека вашиот ученик можеби и не знае за 4 ама откако му ставив 4 е далеку поактивен, работлив итн итн.... Како МОН ќе ги казни наставниците чии ученици имаат лоши резултати? Како ќе казните свој сопартиец кој на терен работи како мравка и ви носи континуирано гласови за победа без која вие не би биле министер, заменик, помошник, државен, советник бла бла ????? Што е поважно министерството или партијата??? Овој состав на МОН е извонреден во наоѓањето/превземањето добри идеи и проекти но е ужасен во нивната реализација. Успеаа сите добри и надежни идеи и проекти да ги упропастат за само 2 години. :( (Jakov 14 Мај, 2009 - 08:32 | логирај се за да пишуваш коментари)

Ова е мое размислување зото екстерното оценување е погрешно и штетно: * Со тестови со повеќекратни одговори (каде што има понудени одговори од кои едниот е точен) не можеш да испиташ она што всушност е суштинско за знаењата односно аналитичкото, творечкото и критичкото мислење. * Знаењето не е статичка категорија, туку дел од процесот на учење и мислење - идејата е дека учениците, луѓето треба да мислат и учат, а не запомнат податоци од некој учебник, и точно да одговорат на тест. * Во контекст кога наставникот се потпира на оценката (заради нејзината вредност и сопствената позиција) како алатка за мотивирање и воспитување покрај вреднувањето на знаењата – „објективното“надоврешно оценување преку тестови на знаења го оневозможува овој процес. Се поставува прашањето за потребата од постоење на наставник, кога некој од надвор може пообјективно да оценува, освен тоа „знаењето“ го има во книгите. * Причините заради кои се донесува и спроведува одлуката е исто така погрешна – ќе потрошат пари од буџетот за спроведување на „објективни“ тесови на знаење за да ги дисциплинираат наставниците, а само како за пример, истовремено нема пари за вработување на дефектолози во училиштата за да се отпочне конечно со процесот на инклузивно т.е. вклучувачко образование. * Поврзано со претходното – тестовите се уште еден стрес за учениците кои немаат за цел испитување на знаењата (што и да значи ова). Прашањето е што со овие податоци од тестирањето? На пример со положување на матурските испити, учениците ќе добијат диплома за завршено средно образование, а со тестовиве што? Нема дури ни компетитивна фнкција...ниту пофалби, никаков фидбек, ништо друго освен корекција на наставникот во неговото оценување, преку грбот на учениците (како што во последно време често се вели)...сироти ученици што грбови имаат, што тежина носат...не е чудно што ги нема во школо...постојано нешто ги боли... не сакаат да не видат!(Ana profesorica 14 Мај, 2009 - 09:27 | логирај се за да пишуваш коментари)

Јаков!!!!
Човече ја ваков трактат кој заоѓа длабоко во етиката не сум читал од Ничевата "После добро и лошо"! Како да се казни партискиот војник!?! Министерство или Партија!?! Да се ќари работа во државна администација или тендер!?!
Ќе можеш ли да напишеш на долго околу овие дилеми, те молам?
(Змејко 14 Мај, 2009 - 09:43 | логирај се за да пишуваш коментари)

Кирила пак се занимава со мене и со мојата егоцентричност.
Јас повеќе би рекол тој што гледа нарцизам и егоизам во реченицата „И јас сум жив пример.„, тој има проблем со нив.
Зар ти стварно мислиш, човеку, дека јас само врз база на мојот пример тврдам дека редовното учење не е врвниот идеал на образованието. Аха, ево сега и листа на имиња на сите паметни студенти што не учат редовно ќе ти дадам. И воедн листа на сите студенти што учат редовно, а пак без резултати (еден куп).
Многу е јасно дека калитетот на наученото е приоритет и се додека се постигнува тоа, не е важно како е дојдено до него. На крај краева, што е тоа редовно учење? Ако учиш два пати во годината за колоквиум и еднаш за испит дали е тоа редовно? Не баш. Во секој случај, не е од тој тип на редовно учење кој побарува ученикот да е спремен за изненаден тест во секој еден ден од неделата за материјалот дотогаш поминат за кое што дискутираме овде. Манијачкото одење дома и уште истиот ден учење на лекциите од тој ден не создава паметни и креативни индивидуи, туку создава програмирани и исплашени роботи.
Професорице Ана,
со прашања со повеќекратни одговори и тоа како може добро (но не и целосно) и објективно да се испита знаењето, но само доколку прашањата се поставени на вистинскот начин.
Проблемот е што кај нас во главно не се знае како да се постави вистинското прашање. Кога го воведоа ЕКТС на Правен, прашањата беа од типот вадени дефиниции од книга каде што треба да се дополни еден збор, а опциите беа малтене сите синоними.(!) Наместо тоа, прашањата треба да бидат примери, конкретни ситуации и аплицирани дефиниции и принципи.
(Сатаниел 15 Мај, 2009 - 20:30 | логирај се за да пишуваш коментари)

еве каква треба да биде хиерархиската шема за класифицирање на знаењата што учениците треба да ги имаат и покажат не само на екстерните тестирања, туку и воопшто за себе, ако целта им е да научат нешто, а не да добијат „петка“(всушност, наставните цели, според Блумовата таксономија)=
од највисоко, најнапредно ниво на знаење, кон најниско:
5 - Евалуација = Вреднување или оправдување на одлука или постапка врз основа на критериуми;
- Синтеза = Составување делови за да се создаде нова целина и да се изведат логични заклучоци;
4 - Анализа = Разложување на составните деловими утврдување на нивните меѓусебни односи;
- Примена = Користење на наученото во нови и конкретни ситуации;
3 - Сфаќање = Разбирање на значењето на материјалот (објаснување на идеите и поимите);
2 - Познавање = Сеќавање на претходно наученото (од одделни факти до целосни теории).
п.с. бројчаните оцени да се сфатат условно во контекст на шемата.
п.п.с. кога учениците би го знаеле ова, сами ќе увидат дека ваквиот начин на оценување е во нивна корист и секој може да се пронајде каде е и што треба да направи за да се подобри.
п.п.п.с. кога наставниците би го сфатиле ова, лесно ќе увидат дека со тоа само им се олеснува нивната работа, и така полесно ќе можат не само да ги формираат своите оценки, туку и да ги оправдаат и одбранат пред кој било фактор.
п.п.п.п.с. од досегашното искуство (со чесни исклучоци), во најголем број случаи, учениците кои добиваат оценка Одличен (5) по голем број предмети, ја добиваат за знаења кои соодветствуваат на нивото на Познавање и Сфаќање. Дали не треба да не` загрижува ова? Зошто повеќето наставници кога формираат оцена, тоа го прават така што се задоволуваат со овие две основни и најниски нивоа, без да се потрудат да ги мотивираат учениците за повеќе? Кој им дава право да ги држат учениците таму? Тоа ли е нашиот идеал, нашиот просек? Ако некој сака поради тој идеал проектот да пропадне, јас сум децидно против!
п.п.п.п.п.с. не сакам да верувам дека отпорот и саботирањето на ваквите иницијативи се должи на желбата да се скрие сопствената неработа, но тој што нема што да крие, не треба да се плаши од ништо, и новото не треба да му претставува страв и неизвеснот, туку можност да направи нешто повеќе за себе и другите, можност да научи.
...
поздрав... 
(prezviterkozma 15 Мај, 2009 - 21:02 | логирај се за да пишуваш коментари)

Хахаха не се карам, само онака револтиран сум и некако на оваа тема постојано се нервирам! =)))
Само да кажам дека на први и трети правам тестови и за да биде уште поинтересна ситуацијата во текот на истата недела, или претходната, нема да бидеме ослободени, наставата ќе си тече обично, ко ништо да не се случува, освен на деновите на кои го правиме тестот. Па верувам дека и сега ќе ми кажете оти сево ова е во моја корист? И тоа што ќе учам цел ден без одмор, без спиење, без што знам јас...право на нормален ЖИВОТ?? е во моја корист?? 
(Lost series 15 Мај, 2009 - 21:53 | логирај се за да пишуваш коментари)